ലോകത്തെ ഏറ്റവും വേഗതയേറിയതും വിലയേറിയതമായ ആംബുലൻസ് റെസ്‌പോണ്ടർ ആയ 'ഹൈപ്പർസ്‌പോർട്ട് റെസ്‌പോണ്ടർ' ദുബായിൽ.

യു.എ.ഇ.യിൽതന്നെ നിർമിച്ച ഡബ്ള്യു മോട്ടോർസിന്റെ ലൈക്കാൻ ഹൈപ്പർസ്പോർട്സ് സൂപ്പർകാറാണ് ദുബായ് എക്സ്പോവേദിയിൽ പ്രവർത്തനം തുടങ്ങിയത്.

2012-ൽ ലെബനിൽ ആരംഭിച്ച ഡബ്ള്യു മോട്ടോർസിന്റെ ഈ അതിവേഗവാഹനം മണിക്കൂറിൽ 400 കിലോമീറ്റർ വരെ വേഗമെടുക്കുന്നതാണ്. പൂജ്യത്തിൽനിന്ന് 100 കിലോമീറ്റർ വേഗം കൈവരിക്കാൻ ഇതിന് വേണ്ടത് വെറും 2.8 സെക്കന്റ് മാത്രമാണ്. 1.3 കോടി ദിർഹമാണ് ഇതിന്റെ വില.

ലൈക്കാൻ ഹൈപ്പർസ്പോർട്സ് ഏഴെണ്ണംമാത്രമാണ് നിർമിച്ചിട്ടുള്ളത്. 780 എച്ച്.പി. കരുത്തുള്ള പോർഷെ ട്വിൻ ടർബോചാർജ്ഡ് എൻജിനാണ് ഇതിന് കരുത്തുപകരുന്നത്. 440 വജ്രങ്ങൾ പതിച്ച എൽ.ഇ.ഡി. ഹെഡ്‌ലൈറ്റുകളാണ് വാഹനത്തിന് വെളിച്ചമേകുക. ഒപ്പം സ്വർണംപതിച്ച ഇന്റീരിയറുകളും വാഹനത്തിന്റെ പ്രത്യേകതയാണ്.

കാറിന്റെ പ്രവർത്തനക്ഷമത അപകടത്തിൽപ്പെടുന്നവർക്ക് പ്രഥമശുശ്രൂഷ വേഗത്തിലാക്കാൻ സഹായകമാകും. 'ദുബായ് -ലോകത്തിലെ ഏറ്റവുംമികച്ച നഗരമെന്ന' വാചകവും വാഹനത്തിന് പുറത്ത് കാണാം.

കാർബൺ ഫൈബറിൽ അത്യാധുനിക സംവിധാനങ്ങൾ എല്ലാം ഉൾപ്പെടുത്തിക്കൊണ്ടാണ് വാഹനത്തിന്റെ ബോഡി നിർമിച്ചിട്ടുള്ളത്. എക്സ്പോ നഗരിയിൽ പ്രദർശിപ്പിച്ച സ്പോർട്സ്‌കാർ ആംബുലൻസ് സന്ദർശകർക്കും കൗതുകമായി.

ലോകത്തിലെ ഏറ്റവും പ്രത്യേകതകൾ നിറഞ്ഞതെല്ലാം ദുബായിൽ ലഭ്യമാക്കുകയന്ന ലക്ഷ്യത്തോടെയാണിതെന്ന് ദുബായ് ആംബുലൻസ് സർവീസ് കോർപ്പറേഷൻ ചീഫ് എക്സിക്യുട്ടീവ് ഖലീഫ ബിൻ ദരായ് പറഞ്ഞു.