ട്രാൻസ്ജെൻഡർ യുവതിയെ തോക്ക് കാണിച്ച് ഭീഷണിപ്പെടുത്തിയ കേസിൽ മൂന്ന് മലയാളികൾ അറസ്റ്റിൽ. യൂട്യൂബർമാരായ ജെ ദിലീപ് (33), എസ് കിഷോർ (23), എച്ച് സമീർ (30) എന്നിവരാണ് പൊലീസ് പിടിയിലായത്. കഴിഞ്ഞ ദിവസം രാത്രി കൗണ്ടംപാളയത്തുവെച്ചാണ് കേസിനാസ്പദമായ സംഭവം നടന്നത്.
യുവാക്കൾ കാറിൽ ഊട്ടിയിലേക്ക് പോകവെ റോഡരികിൽ നിന്നിരുന്ന ട്രാൻസ്ജെൻഡർ യുവതിയെ കണ്ട് പുറത്തിറങ്ങി. തുടർന്ന് യുവതിയുമായി നടത്തിയ സംസാരം വാക്തർക്കത്തിലെത്തുകയും തൊട്ടുപിന്നാലെ ദിലീപ് എയർ പിസ്റ്റൾ യുവതിക്ക് നേരെ ചൂണ്ടുകയുമായിരുന്നു. ഇത് കണ്ട് ചോദ്യം ചെയ്ത നാട്ടുകാരെയും യുവാക്കൾ ഭീഷണിപ്പെടുത്തി.
വിവരമറിഞ്ഞ് സ്ഥലത്തെത്തിയ പൊലീസ് പ്രതികളെ കസ്റ്റഡിയിലെടുക്കുകയായിരുന്നു. സംഭവസമയത്ത് പ്രതികൾ മദ്യപിച്ചിരുന്നതായി പൊലീസ് അറിയിച്ചു. അതിക്രമം നേരിട്ട പുതുക്കോട്ട സ്വദേശിനി നൽകിയ പരാതിയിൽ യുവാക്കൾക്കെതിരെ വധശ്രമത്തിന് കേസെടുത്ത് മൂവരെയും കോടതിയിൽ ഹാജരാക്കി. കോടതി ജുഡീഷ്യൽ കസ്റ്റഡിയിൽ റിമാൻഡ് ചെയ്ത് കോയമ്പത്തൂർ സെൻട്രൽ ജയിലിലയച്ചു.
No comments:
Post a Comment